Ermənistan hərbi-hava qüvvələrinin hərbi təlimlər üçün işğal olunmuş Azərbaycan torpaqlarına gətirilmiş helikopterləri, hələ də daimi dislokasiya yerlərinə qayıtmayıblar. Kanal24.az xəbər verir ki, AzPolitika.info-nun məlumatına görə, bu barədə Ermənistanın tert.am saytı özlərinin hərbi mənbələrinə istinadla sensasiyalı məlumatlar yayıb.

Məlumatda bildirilir ki, Yerevan yaxınlığındakı hərbi bazadan təlim üçün işğal altındakı Azərbaycan ərazilərinə göndərilmiş helikopterlər geri qayıda bilmirlər.

“Məlum olub ki, noyabrın 12-də Azərbaycan silahlı qüvvələri tərəfindən vurulmuş Mi-24 hərbi helikopterinin döyüş cütlüyündə olmuş helikopter də partlayış zamanı ciddi zədələr alıb və hazırda Qarabağdakı hərbi hissələrdən birinin helikopter meydançasındadır. Onun döyüş sırasına qayıtması üçün təmir-bərpa işləri aparılmaqdadır” – Tert.am-ın məlumatında belə deyilir.

Erməni saytı daha sonra yazır ki, Yerevan yaxınlığındakı hərbi bazadan Qarabağ ərazisinə gətirilmiş 7 helikopterdən digər 5-i də, vurulmaq təhlükəsinə görə havaya qalxa bilmirlər.Belə ki, işğal altında olan ərazilərin hava məkanı tam şəkildə Azərbaycan Hərbi Hava və Hava Hücumundan Müdafiə Qüvvələrinin gücləndirilmiş nəzarəti altındadır.

Ermənistanın populyar saytlarından birinin bu məlumatları sensasiya xarakterli olmaqla yanaşı, düşmən tərəfin helikopterin vurulmasından sonra keçirməkdə olduğu qorxu və həyacanı da bir daha gözlər önünə sərir.