Kəndlilər ötən iki ay ərzində 3650 hektar nar bağından ilkin hesablamalara görə 47 min tona yaxın nar yığıblar. Məhsulun bir hissəsi yerli və xarici bazarlara çıxarılıb, zədəli meyvələr isə şirə emalı müəssisələrinə satılıb. Bu il bağlara yüksək səviyyədə aqrotexniki xidmətin göstərilməsi və havanın əlverişli keçməsi məhsulun bol olmasına səbəb olub. Belə ki, cari ildə bağlardan ötən ildəkindən 2800 tondan çox nar məhsul tədarük olunub. Ötən il rayonda 44 min 500 ton nar yığılıb.

Göyçayda narçılığa maraq ildən-ilə artır. Rayonda yeni və məhsuldar nar sortlarının yetişdirilməsi, təzə bağların salınması üçün hazırda tədbirlər görülür. Boş və istifadəsiz qalan torpaqlarda qiymətli nar sortlarından olan tinglərin əkini həyata keçirilir. Narın 67 sortunun yetişdirildiyi Göyçay rayonunda bağbanlar əsasən “Gülövşə”, “Vələs”, “Şəndi”, “Şirin”, “Şıxbaba”, “Bala Mürsəl” nar sortlarının əkilməsinə üstünlük verirlər. Nar tinglərinin əkini prosesi gələn ilin aprelinədək davam edəcək.

Xatırladaq ki, son 3 ildə rayonda 150 hektardan çox sahədə yeni nar bağı salınıb. İndi Göyçayda 100-dən çox fermer narçılıqla məşğul olur. İyirmi il əvvəl Göyçayda 251 hektar məhsuldar nar bağı vardısa, hazırda bu rəqəm 3650 hektara çatdırılıb./AzerTac/