Noyabrın 30-da Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilib. Paytaxt əhalisinin kənd təsərrüfatı məhsullarına tələbatını ödəmək məqsədilə keçirilən yarmarkalara mövsümə uyğun meyvə-tərəvəz məhsulları çıxarılıb.

Bazar günü “Təzə bazar” MMC-nin həyətindəki yarmarkada alıcılara Sabirabad, Gədəbəy, Hacıqabul və digər rayonlardan gətirilmiş 10,45 ton məhsul, o cümlədən 0,4 ton ət, 0,1 ton ağartı, 2,5 ton tərəvəz, 4 ton meyvə, 0,2 ton bostan məhsulları və s. təklif olunurdu.

Kənd Təsərrüfatı Nazirliyinin nümayəndəsi Səfəralı Nəsirov dedi ki, yarmarkadakı qiymətlər bazarlardakından 20-25 faiz ucuzdur. Yarmarkada badımcan 40-70, kartof 60-80, soğan 30-35, yerkökü 70-90 qəpiyə satılır. Burada, həmçinin qoyun ətinin kiloqramı 6 manata, mal əti 5 manata, yumurtanın 1 ədədi 7-9 qəpiyə təklif olunur. Ümumilikdə şənbə və bazar günlərində yarmarkada paytaxt sakinlərinə 21 ton məhsul satılıb.

Yasamal rayonunda, Bakı Rabitə və Nəqliyyat Kollecinin həyətində təşkil edilmiş kənd təsərrüfatı məhsullarının satış yarmarkasına istirahət günlərində bu əraziyə təhkim olunmuş Salyan, Qusar, Astara, Şabran, bundan əlavə, Sabirabad, Kürdəmir, Bərdə, Xaçmaz, Quba, Göyçay və Gədəbəy rayonlarının fermerləri və digər torpaq mülkiyyətçiləri 145,6 ton meyvə-tərəvəz, bostan məhsulları, mal və qoyun əti, ağartı, göyərti və digər məhsullar gətirmişdilər.

Kənd Təsərrüfatı Nazirliyinin nümayəndəsi Vidadi Bayramov məlumat verdi ki, paytaxt sakinləri mövsümə uyğun meyvə-tərəvəzlərdən kartof, soğan, badımcan, kələm, lobya, alma, armud, üzüm, nar, heyva, həmçinin balqabaq və digər bostan məhsullarını daha həvəslə alırlar.

Şənbə günündə olduğu kimi, noyabrın 30-da da yarmarkada səliqə-sahman, fermerlərə və digər torpaq mülkiyyətçilərinə, eyni zamanda, buraya bazarlığa gələn paytaxt sakinlərinə əlverişli şəraitin yaradılması diqqəti daha çox cəlb edirdi.

Məhsullar bazarlardakından 25-30 faiz ucuz qiymətə təklif olunurdu. Bunun nəticəsində istirahət günlərində yarmarkaya daxil olmuş məhsulların təqribən 90 faizindən çoxu satılmışdı.

Bütün məhsulların sanitar-gigiyenik vəziyyəti Kənd Təsərrüfatı Nazirliyi yayında Dövlət Fitosanitar Nəzarəti Xidməti tərəfindən diqqətlə yoxlanılmışdı.

Yarmarkada qoyulmuş nəzarət tərəzisində hər kəs aldığı məhsulun çəkisini yoxlaya bilərdi.

Kənd Təsərrüfatı Nazirliyinin nümayəndəsi Mustafa Rüstəmov məlumat verdi ki, bazar günü Suraxanı rayonu ərazisində təşkil olunmuş yarmarkalarda – “Günəş” ticarət mərkəzində (23 ton) və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində (2,5 ton) satışa bir gün əvvəl Samux, Quba, Biləsuvar, Cəlilabad və Ağsu rayonlarından gətirilmiş ümumilikdə 25,5 ton məhsulun, demək olar ki, hamısı satılıb.

Hər iki yarmarkada meyvələrdən alma, armud, üzüm, nar, heyva, əzgil, tərəvəzlərdən pomidor, xiyar, soğan, kartof, badımcan, bibər, lobya, göyərti, bostan məhsullarından balqabaq və digər mövsümi kənd nemətlərinin alıcıları çoxluq təşkil edirdi.

Bazarlarla müqayisədə qiymətlər 25-30 faiz ucuz idi. Məhsulların keyfiyyəti ciddi surətdə yoxlanılmış, ət və süd məhsulları baytar müayinəsindən keçirilmişdi.

Xəbər verdiyimiz kimi, şənbə günü Xətai rayonunda, “Bakı” kinoteatrının yaxınlığındakı yarmarkaya Kürdəmir, Salyan, Biləsuvar, Qax, Şəmkir, Qəbələ, Quba, Astara, Daşkəsən rayonlarından 350 ton meyvə-tərəvəz, ət və süd məhsulları gətirilmişdi.

Kənd Təsərrüfatı Nazirliyinin nümayəndəsi İsmayıl Sərdarlı məlumat verdi ki, şənbə və bazar günlərində yarmarkada bazarlardakından 20-25 faiz ucuz qiymətə 340 tondan çox üzüm, alma, armud, nar, heyva, feyxoa, naringi, pomidor, xiyar, kartof, kələm, kök, çuğundur, badımcan və digər məhsullar satılıb.

Binəqədi rayonu, 6 nömrəli Bakı Texniki Peşə Liseyinin qarşısındakı yarmarkaya Bərdə, Ağstafa, Siyəzən, Goranboy və digər rayonların fermerləri müxtəlif çeşiddə məhsullar çıxarmışdılar. Məhsullar bazarlardakından 20-30 faiz ucuz qiymətlərə idi. Şəhər sakinləri kartofun kiloqramını 40-80, kələmi 50-60, soğanı 30-35, almanı 20-40 qəpiyə ala bilirdilər.

Kənd Təsərrüfatı Nazirliyinin nümayəndəsi Qadir Həsənov bildirdi ki, şənbə və bazar günlərində yarmarkada 27 ton məhsul satılıb.