Beynəlxalq Əlillər Günü ərəfəsində Abşeron rayonunun Xırdalan şəhərində “İstedadlı Əlillər“ İctimai Birliyinin təşkilatçılığı ilə 3 dekabr- Beynəlxalq Əlillər Günü ilə bağlı tədbir keçirilib.

Kanal24.az xəbər verir ki, tədbir iştirakçıları əvvəlcə Birliyin üzvlərinin əl işləri və rəsm əsərlərindən ibarət sərgi ilə tanış olublar.

Abşeron Rayon İcra Hakimiyyəti başçısının birinci müavini İradə Gülməmmədova tədbirdə çıxış edərək bildirib ki, BMT tərəfindən təsis olunan və dekabrın 3-də bütün dünyada keçirilən Beynəlxalq Əlillər Günü ulu öndər Heydər Əliyevin müvafiq Sərəncamına əsasən, 1994-cü ildən Azərbaycanda da hər il qeyd edilir. Ölkəmizdə sosial qayğıya ehtiyacı olan bütün insanlar kimi, əlillər də daim dövlətimizin diqqət və qayğısı ilə əhatə olunurlar, onların bütün problemlərinin həlli üçün zəruri tədbirlər həyata keçirilir.

Vurğulanıb ki, əlillərin rifahının yaxşılaşdırılması, onların problemlərinin həlli Prezident İlham Əliyevin daim diqqət yetirdiyi məsələlərdəndir. Bu qəbildən olan insanların sosial problemlərinin həlli, mənzil şəraitinin daha da yaxşılaşdırılması və pensiya müavinətlərinin artırılması sahəsində atılan məqsədyönlü addımlar bunun bariz nümunəsidir. Ölkəmizin hər yerində olduğu kimi, Abşeron rayonunda da əlillərin diqqət və qayğı ilə əhatə edildiyi qeyd edilib.

Tədbirdə çıxış edən gündən-günə çiçəklənən respublikamızda əlillərin sosial rifahının daha da yaxşılaşdırılması istiqamətində həyata keçirilən layihələrdən və onlara olan dövlət qayğısından ətraflı söhbət açıblar. Onlar göstərilən diqqət və qayğıya görə dövlətimizin başçısına və Heydər Əliyev Fondunun prezidenti Mehriban xanım Əliyevaya minnətdarlıqlarını bildiriblər.

Gecənin keçirilməsində məqsəd fiziki məhdudiyyəti olan şəxslərin yaşadığı problemlərin həllinə dəstək göstərmək, parlaq gələcək qurmaqda onlara yardımçı olmaq və cəmiyyətin bu məsələyə diqqətin çəkmək, sosial aktiv vətəndaşları bu yöndə fəaliyyətə cəlb etməkdir.Eyni zamanda tedbirdə fiziki məhdudiyyəti olan şəxslərin özlərinin də ictimai fəaliyyətdə aktivlik göstərməsinin vacibliyi xüsusi olaraq qeyd edildi.

Tədbirdə istedadlı əlillərin əl işlərinin nümayişi və musiqi istedadı olan əlillərin ifaları dinlənildi.

Tədbir respublikanın tanınmış incəsənət ustalarının ifasında konsert proqramı ilə davam edib.