Əlbəttə, mən anlayıram. Sovet keçmişimiz olub, KQB-nin xofu qalıb. KQB-yə işləməyin xəcaləti yaddan çıxmayıb. Amma o təşkilatın adı KQB idi və öz xalqına qarşı işləyirdi. MTN isə öz xalqına işləyir. Milli Təhlükəsizlik Nazirliyi bizimdir. Bu qurumla əməkdaşlıq etmək ayıb sayılmamalıdır. Əgər hər hansı bir şübhəli nəsə və ya kimisə aşkar edirsinizsə, dərhal məlumat verin” - deyə M.Ağayev vətəndaşlara xitab edib. 

 

M.Ağayevin çağırışınıa münasibət bildirən  politoloq Natiq Miri deyir ki, Azərbaycan dövləti üçün hər hansı bir təhlükə olarsa, vətəndaşlar təhlükəsizlik orqanları ilə əməkdaşlıq etməlidir: “O mənada ki, vətəndaş millətin, dövlətin təhlükəsizliyinə xətər yetirə biləcək halla bağlı aldığı informasiyanı dərhal Milli Təhlükəsizlik Nazirliyinə ötürməlidir. Ancaq bundan sonrakı əməliyyatda iştirak vətəndaşın borcu deyil. Vətəndaşın xüsusi xidmət orqanları ilə hakimiyyətin maraqları kontekstində əməkdaşlıq etməsi qətiyyən yol verilən deyil. Vətəndaş üçün bu, qayda şəklində qəbul etdirilə bilməz. Təəssüf ki, Azərbaycanda dövlətlə hakimiyyət anlayışı qarışdırılır. Hakimiyyət müvəqqətidir və digər hakimiyyətlə əvəzlənə bilər. Ona görə də dövlətin davamlılığı millətin, xalqın davamlılığıdır. Təbii ki, vətəndaşlar dövlətlə müəyyən mənada əməkdaşlıq edə bilər. Bəziləri hakimiyyətə xidməti də dövlətə xidmət kimi qiymətləndirir. Yanlış budur”.

 

 

N.Miri  “KQB” ilə MTN-nin fərqli qurumlar olduğunu deyib: “MTN bir millətə xidmət edən təhlükəsizlik orqanıdır. Bu orqan vətəndaşdan hakimiyyətin maraqları çərçivəsində istifadədən çəkinməlidir. KQB isə imperiya maraqlarına xidmət edən bir orqan idi. Onun üçün vətəndaş anlamı yox idi”. 

 

Sabiq təhlükəsizlik zabiti Arzu Nağıyev deyir  ki, 1991-ci ildə,  ordumuz yaranmayan vaxtlarda Azərbaycanın ərazi bütövlüyünü qoruyan silahlı birləşmələrin demək olar ki, özəyini məhz MTN əməkdaşları təşkil edib: “Onlar kəndləri qoruyur, erməni quldur dəstələrinə qarşı  vuruşurdu. O vaxt bu əməkdaşlar qarşısında bir amal var idi - Vətən. Onlar əllərində silah günlərlə, aylarla həyatlarına risk edərək döyüş bögələrində olub, erməni muzdur-quldur dəstələrinə qarşı vuruşublar. Bu yolda şəhid olan əməkdaşlar da olub. Maraqlıdır ki, rəhmətlik Çingiz Mustafayev də, Mirşahin Ağayev də həmin günlərin şahidi olub. Buna görə də Mirşahin bəyi mən gözəl başa düşürəm. Bu gün də MTN, dövlət və dövlətçiliyə qarşı yönəlmiş cinayətlərin aşkarlanması, qarşısının alınması və açılması sahəsində fəaliyyətlər həyata keçirir. Əgər bu istiqamətdə bu qurumla əməkdaşlıq etmək ayıb sayılırsa, demək, bunu dərk etməyən hər bir şəxs qeyri-adekvat düşüncəli adamdır”. 

 

A.Nağıyev MTN-in KQB  ilə müqayisə edilməsinin düzgün olmadığını da bildirib.

Sabiq təhlükəsizlik zabitinin  “Avropa Oyunları ərəfəsində ölkəmizdə terror və ya bu kimi qeyri-stabillik yaradan olaylar ola bilərmi” sualına cavabı belə olub: “Müharibələrin sərhədlərimizdən çox da uzaqda olmayan ərazilərdə aparılması, ərəb ölkələrində baş verən olaylar, Ermənistanla müharibə vəziyyəti, dini ekstremizmin qabarıq şəkildə büruzə verilməsi bu gün reallıqdır. Yəni milli maraqları təhdid edən istənilən təhlükəyə qarşı hər zaman hazır olmaq lazımdır.  Bu  təhlükə yalnız hər gün adı daha çox hallanan İŞİD və digər dini-ekstremist qruplarla bağlı deyil.  Son zamanlar Qarabağda, döyüş cəbhəsində baş verən hadisələr, Ermənistan rəsmilərinin bəyanatları bu istiqamətdən də terror təhdidini gücləndirir. 

 

 

Bu vəziyyətdə isə MTN tərəfindən  qabaqlayıcı tədbirlər görülür, təhlükəsizlik tədbirlərini, kəşfiyyat, əks-kəşfiyyat işini gücləndirmək üçün önləyici  addımlar atılır. Bütün bunları nəzərə alsaq, Avropa Oyunları ərəfəsində ölkəmizdə terror və ya bu kimi qeyri-stabillik yaradan olaylara qarşı hazır olmaq lazımdır”. A.Nağıyev vətəndaşın MTN-lə əməkdaşlıq etməsi məsələsinə də aydınlıq gətirib: “Bilirsiniz ki,  Azərbaycan Respublikasının ali qanunu olan Konstitusiyasında təsbit edilmiş maddələrdən birində ”Hər kəsin təhlükəsiz yaşamaq hüququ vardır" sözləri var. Bundan başqa, cəmiyyətin və dövlətin siyasi həyatında maneəsiz iştirak etmə hüququ var. Yəni hər hansı bir təhdidə qarşı müqavimət göstərmək hər bir vətəndaşın hüququdur. Bu, borc deyil və hüquqi məsələdir"./musavat.com/